Alain Délisca

pibliye pa ALAIN DÉLISCA | 970p
June 16, 2021

James Tony Luc, yon etidyan nan travay sosyal k ap viv nan peyi kanada, se envite nou nan 18yèm epizòd koze kilti vyòl. Avèk li, nou te fè yon ti rale sou let’s talk about sex ki vle an nn pale sou fè bagay. Pa egzanp, nan kesyon fè bagay, nou plis rete sou plezi gason sa poutan fi patisipe nan ak la tou. Avan nou te resevwa James, Bibiana te vini ak atelye a  ki se yon seri fason pou nou konprann kisa fè bagay vle di pou nou.

James Tony Luc te aksepte pale avè n nan telefòn pandan nou te nan stidyo ANVA a. Ansanm nou te rale sou ou gen dwa di non. Nou ka koute rezilta ti chita pale sa la :

James te komanse pale sou mo nou itilize pou n dekri fè bagay . An Ayiti, nou pale de fè lanmou. Nan sans, li plis wè yon moman pataj kote de moun dakò e konprann sa yo pral fè a. Poutan, fason yo leve gason an Ayiti fè yon konprann yo gen tout pouvwa sou seksyalite yon fi. Konsa, yo vin pa nan yon lojik pataj ankò men nan yon lojik pran. Lè konsa, sa fi vle a tout bon vin pa konte. Depi dezi gason a satisfè, tout bagay fini. Fi yo menm entregre mòd panse sa yo ak sa yo rele devwa konjigal la. Yo fè bagay pou mari yo pa kite yo

Tony, te fon ti rale sou enpòtans pou n pale de fantasm, jeux de rôles ak gadjèt seksyèl ak patnè nou. Pou li, se nan pale sèlman n ap konnen limit lòt la, konnen sou kisa nou dwe avanse oubyen konnen sou kisa nou dwe kanpe. Li estime tou yon moun ki konsidere patnè l ap konsidere tout limit ki lye ak relijyonl ak moral li ki ka fè l pa alèz nan kèk pratik seksyèl. . Se konsa daprè li n ap ka tabli yon veritab kilti konsantman e konnen kisa patnè w vle tout bon vre. 

Nan epizòd sa tou, nou wè kèk egzanp kote moun yo ka pale de anvi yo, de fantasm yo nan fè bagay. Tony ensiste pou de moun yo pale, pou edike moun ki nan antouraj patikilyèman timoun ki rive nan laj pou poze kesyon sou fè bagay. Li panse tou se pa tout lè patnè yo alèz pou yo pale de anvi yo ak fantasm  yo. Li pwopoze pou yo ekri yo sou yon papye epi pou yo pwosede pa eliminasyon. Sak pi enpòtan se pou yo pale pou yo tabli yon veritab kiltikonsantman e kwape kilti vyòl. Solisyon an se nan kontinye #PafèSilans.

Se pou ede fè chanjman sa, Ayiti Nou Vle A lanse pòdkas Koze Kilti Vyòl la. Si w ta renmen kite sijesyon pou amelyore pòdkas la, klike sou sijesyon. Si w ta renmen reyaji sou epizòd la an antye, kite yon kòmantè anba paj sa.

Mèsi pou enterè w pou pòdkas la. M kontan w la.

Alain


Vwa moun ki nan emisyon sa:

Lokasyon: ANVA Studios. 

Miksaj: Patricia Camilien pou ANVA Medya.

Klike la pou dekouvri tout ekip pòdkas la.

Yo

Adres imel ou pa pral pibliye. Jaden obligatwa yo make *