Alain Délisca

pibliye pa ALAIN DÉLISCA | 970p
November 07, 2020

Èvya Dòsenvil, yon jonalis, se envite nou nan katriyèm epizòd koze kilti vyòl. Avèk li, nou te fè yon ti rale sou kèk pawòl gwo zotobre ki ankouraje kilti vyòl. Pa egzanp, anpil fwa otorite yo toujou mande viktim yo fè atansyon ak kote yo prale, ak lè yap sòti epi rad y ap mete pou yo pa vyole yo. Sa vin parèt tèlman nòmal, lè yon fanm sibi kadejak oubyen tout lòt fòm vyolans seksyèl, premye reflèks otorite yo se kritike yo sou rad ki te sou yo, lè yo te sòti ak kote yo tale. Sa konn fè viktim yo prefere fè silans e predatè yo parèt gen yon boulva devan yo pou yo fè sa yo vle.

Èvya Dòsenvil te aksepte vin nan stidyo ANVA a pou n pale sou kèk pawòl gwo zotobre ki ankouraje kilti vyòl. Nou ka koute rezilta ti chita pale sa, la :

Èvya Dòsenvil, pale tou sou vyolans seksyèl ki konn rive fi ki gen otorite. Pou li, se pa paske yon fi gen otorite ki fèl epanye anba kadejak ak vyolans seksyèl . Li te pran egzanp sou madanm prezidan yo, kote yo toujou ap ekri move bagay sou yo nan lari. Yo toujou ap dezynye yo ak pati entim yo. Li panse vizyon sosyete a genyen sou nenpòt fanm se li Lap genyen sou yon fanm menm sil madan prezidan, majistra, elatrye. Depi sosyete chanje vizyon li genyen sou fanm, tout fanm kit li gen otorite, kit li pa gen otorite ap santil pi alèz pou l viv nan peyi a.

Nan epizòd sa tou, nou te fè yon ti rale sou fason otorite ki gen akizasyon vyòl sou yo renmen si se pèsekisyon politik. Se yon fraz paspatou paske yo konnen pa gen anyen kap rive. Pou konbat enpinite sa, nou dwe pale, kenbe sa aktyalite li a pou viktim yo sispann wont. Men Hervia presize okenn viktim pa dwe nou istwa l. Gason ki pa vle yo trete tankou predatè dwe mete vwa yo ak viktim yo pou kontinye#Pafèsilans pou otorite yo pran men yo.

Se pou ede chanjman sa, Ayiti Nou Vle A lanse pòdkas Koze Kilti Vyòl la. Siw ta renmen kite sijesyon pou amelyore pòdkas la, klike sou sijesyon. Si w ta renmen reyaji sou epizòd la an antye, kite yon kòmantè anba paj sa.

Mèsi pou enterè w pou pòdkas la. M kontan w la.

Alain


Vwa moun ki nan emisyon sa:

Lokasyon: ANVA Studios, Telefòn pèsonèl. 

Miksaj: Perez Riquemi + Patricia Camilien pou ANVA Medya.

Klike la pou dekouvri tout ekip pòdkas la

Yo

Adres imel ou pa pral pibliye. Jaden obligatwa yo make *