Alain Délisca

pibliye pa ALAIN DÉLISCA | 970p
October 31, 2020

Chantal Merzier-Élie, yon analis politik, se envite nou nan twazyèm epizòd Koze Kilti Vyòl. Li se yon militant anti-tizonnay. Avèk li, nou te fè yon ti rale sou kèk pawòl nou souvan aksepte nan kad pwofesyonèl ki ankouraje kilti vyòl. Pa egzanp, anpil fwa patwon yo toujou mande yon bagay pou w jwenn travay, jwenn pwomosyon e menm rive kenbe travay ou. Sa vin parèt tèlman nòmal, lòt kòlèg nan travay yo aksepte sa nan yon pwen kote lè yon moun pa dakò ak jan de pratik sa yo, yo gadel mal oubyen aji yon fason avèl pou l santi l mal. Sa konn fè viktim yo prefere fè silans.

Chantal Élie te aksepte vin nan stidyo ANVA a pou n pale sou kèk pawòl nou aksepte nan kad pwofesyonèl ki ankouraje kilti vyòl. Nou ka koute rezilta ti chita pale sa, la :

Madan Chantal kòmanse pale sou yon tèm li te devlope nan yon atik li te ekri nan Le Nouvelliste, koripsyon seksyèl. Li te defini koripsyon seksyèl kòm tout sa ki antre nan dwa yon moun men yo mande l pou l bay yon bagay seksyèl pou l jwenn li. Li te pran egzanp sou tèt li kote te gen premye minis alepòk la tap fèl avans. Li tal di yon bon zanmi l sa ki te fè gwo etid, yon mastè an dwa, poutan zanmil lan te reponn li :« Zafè w regle! Ou jwenn bòs ou entèrese avè w…»

Madam Élie, te pale tou sou kijan fi yo konn pa souvan gen chwa. Lè yo rejte avans patwon yo, yo konn di yo enkonpetant, lè yo rive nan sitiasyon kote patwon an fè fòs sou yo, yo di se sa yo tap chache. Li te pran egzanp sou tèt li ankò, kote byen ta nan aswè, yon patwon l te dil vin siyen yon dokiman nan chanm li. Li te reponn li na wè demen. Patwon an fè yon move rapò sou li komkwa li pat konpetan : « Moun sa yo se predatè, yo konn Kijan pou yo mete nan sitiasyon ki pou mare pye w…. Si w ale, y ap di se sa w tap chache… si w pa vle, y ap di w paka fè travay la. » Li pwofite fon pale sou tizonnay ak sa li anglobe. Pou li, tizonnay se tout ti jès, ti pawòl ki pou fè yon fi santi l vin piti nan pèsonalite l. Se pawòl tankou: « Pa di bagay sa yo devan entèl papa. », se ti chuichui ki fè w santiw pa alèz. Daprè Chantal, tout pawòl ak jès sa yo ka fè w pa anvi rete nan travay ou, fè w santi la pa la w.

Nan epizòd sa tou, nou te fè yon ti rale sou medam kap met foto ak videyo oze sou rezo sosyal yo. Nou tap gade si jan de aksyon sa yo pa kite yon baryè louvri pou patwon ak kòlèg vin fè avans. Daprè madan Chantal, yon fi kap poste videyo ak foto oze pa yon envitasyon pou patwon ak kòlèg vin fè agresyon. Se pa paske yon fi bèl oubyen abiye yon fason sexy ki vle di li entèrese. Pou li, solisyon an se edikasyon li ye pou chak moun respekte espas lòt. Epi tou, fòk viktim yo kontinye#PafèSialns pou lòt moun ka pa pè pale ak fè agresè yo wont.

Se pou ede chanjman sa, Ayiti Nou Vle A lanse pòdkas Koze Kilti Vyòl la. Siw ta renmen kite sijesyon pou amelyore pòdkas la, klike sou sijesyon. Si w ta renmen reyaji sou epizòd la an antye, kite yon kòmantè anba paj sa.

Mèsi pou enterè w pou pòdkas la. M kontan w la.

Alain


Vwa moun ki nan emisyon sa:

Lokasyon: ANVA Studios, Telefòn pèsonèl. 

Miksaj: Perez Riquemi + Patricia Camilien pou ANVA Medya.

Klike la pou dekouvri tout ekip pòdkas la


Epizòd sa ap pase sou 8 radyo ki deside ede laji konvèsasyon an pou nou #PaFèSilans. Ou ka suiv emisyon an tou sou Facebook Watch oubyen sou Youtube.

Yo

Adres imel ou pa pral pibliye. Jaden obligatwa yo make *