Alain Délisca

pibliye pa ALAIN DÉLISCA | 970p
October 24, 2020

Emmanuelle Georges, fondatris fim Love Your Being, se envite nou nan dezyèm epizòd koze kilti vyòl. Li se yon coach de vie sètifye. Avèk li, nou te fè yon ti rale sou kèk pawòl nou di chak jou lè n ap pale ak pwòch nou (zanmi, fanmi) ki ankouraje kilti vyòl. Pa egzanp, pawòl nou konn itilize pou n pale de fè bagay ak yon fi (sitou lè li pa menaj nou) vyolan anpil. Nou leve tigason nou yo nan peyi a nan yon lojik kote yo gen tout dwa sou seksyalite fi yo pandan nou aprann fi yo wont seksyalite yo. Sa konn fè viktim yo prefere fè silans.

Emmanuelle Georges te aksepte pale avèk nou nan telefòn pandan nou te nan stidyo ANVA a sou kèk pawòl nou di chak jou lè n ap pale ak pwòch nou ki ankouraje kilti vyòl. Nou ka koute rezilta ti chita pale sa, la:

Madam Georges kòmanse pale sou seksyalite (seksyalite fi sitou) ki tabou nan sosyete a. Li te pran egzanp sou sa papa l ki te panse li tap pwoteje l, poutan san l pat konnen, li tap kategorize seksyalite fi ak seksyalite gason :« M sonje lè n te pi jèn, papa m te di m se tifi w ye, sa w genyen an, si wap bay li, fòk ou konn a kiyès wap li paske gason renmen piyay » men papa l te di ti frè l se gason li ye, si fanm ap bay, fòk ou konnen pou w pran.

Madam Georges, te pale tou sou edikasyon seksyèl ki pa fèt kay tifi tankou kay tigason yo ki fè yo pè pale lè yo viktim. Li pwofite raple tigason yo konn viktim tou. Li pale de fanmi yo ki pè eskonbrit. Yo pito chache fèy kouvri sa. Li pale tou de sitiyasyon ekonomik ki konn pouse paran yo aksepte lòt mou nap abize pitit yo. Egzanp bòpè yo pi kouran. Li dakò pa fè silans nan ka sa yo ap difisil men rete gade sa ka fè viktim yo mal anpil. Daprè Emmanuelle, li tap toujou pi bon pou fanmi yo ak zanmi yo tande viktim lan, fèl konprann se pa li ki koupab epi konfwonte agresè a.

Nan epizòd sa tou, nou te fè yon ti rale sou jwèt madanm mouche ki konn genyen ant granmoun ak timoun, ant de timoun. Madan Georges prefere nou pran chak bagay apa paske tout moun pa agresè menm si li menm li pap fèl mòd jwèt sa yo. Pou li, solisyon an se edikasyon li ye pou timoun yo konnen ki kote limit la ye. Epi tou, Fòk pwòch yo pare pou tande yo e akonpanye yo pou viktim yo vin #PafèSialns.

Se pou ede fè chanjman sa, Ayiti Nou Vle A lanse pòdkas Koze Kilti Vyòl la. Si w ta renmen kite sijesyon pou amelyore pòdkas la, klike sou sijesyon. Si w ta renmen reyaji sou epizòd la an antye, kite yon kòmantè anba paj sa.

Mèsi pou enterè w pou pòdkas la. M kontan w la.

Alain


Vwa moun ki nan emisyon sa:

Lokasyon: ANVA Studios, Telefòn pèsonèl. 

Miksaj: Perez Riquemi + Patricia Camilien pou ANVA Medya.

Klike la pou dekouvri tout ekip pòdkas la


Epizòd sa ap pase sou 7 radyo ki deside ede laji konvèsasyon an pou nou #PaFèSilans. Ou ka suiv emisyon an tou sou Facebook Watch oubyen sou Youtube.

Yo

Adres imel ou pa pral pibliye. Jaden obligatwa yo make *