14 septanm 2018 la fè #PetroCaribeChallenge yon mwa. Pou nou make dat sa, Ayiti Nou Vle A envite w patisipe nan yon Odit Kolektif pandan n ap tann enstitisyon Leta yo travay pou reponn kesyon #KotKòbPetroCaribeA.
Men kijan ou ka patisipe nan Odit Kolektif la.
- Chèche ki pwojè ki te finanse pou zòn ou an, chwazi youn epi ekri enfòmasyon ou jwenn sou li yo yon kote.
- Lè w fin byen enfòme sou pwojè a, ak yon telefòn ou oubyen yon kamera, ale sou plas, epi pran yon ti videyo sou pwojè a kote w ap eksplike sa l ye, kote l ye, pou konbyen kòb li te fèt, elt.
- Poste videyo sa sou Twitter oubyen Facebook ak 2 achtag sa yo: #KotKòbPetroCaribeA #OditKolektif.
#AyitiNouVleA ap rasanble tout videyo sa yo sou paj Facebook li a pou tout moun gen chans wè yo.
Konsa lè odit enstans Leta yo rive an janvye, n ap gentan te fè ti travay pa nou, pou nou ka sou men nou.
Men yon lis pwojè Petro Caribe yo, dapre diferan rapò MTPTC, Primati, CNMP, elt. Si w ta renmen plis enfòmasyon, ou ka konsilte dokiman sa yo dirèkteman la.